នាព្រឹកថ្ងៃទី១៤ ខែធ្នូ ឆ្នាំ២០១៧ នាយកដ្ឋានមុខងារ និងធនធាននៃអគ្គនាយកដ្ឋានរដ្ឋបាល ក្រសួងមហាផ្ទៃបានរៀបចំពិធីបើកសិក្ខាសាលាបូកសរុបលទ្ធផលនៃការអនុវត្តការងារការិយាល័យច្រកចេញចូលតែមួយ និងការិយាល័យប្រជាពលរដ្ឋប្រចាំឆ្នាំ២០១៧ និងលើកទិសដៅសកម្មភាពការងារឆ្នាំ២០១៨ ក្រោមអធិបតីភាពឯកឧត្តម ប្រាក់ សំអឿន អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ។
ពិធីនេះមានការអញ្ជើញចូលរួមពីថ្នាក់ដឹកនាំ និងមន្ត្រីនៃអគ្គនាយកដ្ឋានរដ្ឋបាល នាយកដ្ឋានមុខងារ និងធនធាន លេខាធិការដ្ឋានគ.ជ.អ.ប នាយក-នាយករងរដ្ឋបាលរាជធានី ខេត្តទាំង២៥រាជធានី ខេត្ត អភិបាល-អភិបាលរងក្រុង ស្រុក ខណ្ឌ ប្រធានការិយាល័យច្រកចេញចូលតែមួយ និងប្រធានការិយាល័យប្រជាពលរដ្ឋនៃក្រុង ស្រុក ខន្ឌគោលដៅចំនួន៥២ រួមទាំងតំណាងដៃគូអភិវឌ្ឍន៍ សរុបប្រមាណជាង២០០នាក់។
សិក្ខាសាលាមានរយៈពេល២ថ្ងៃ ដែលត្រូវបានរៀបចំដោយនាយកដ្ឋានមុខងារ និងធនធាននៃអគ្គនាយកដ្ឋានរដ្ឋបាល ក្រសួងមហាផ្ទៃ ក្រោមកិច្ចសហការគាំទ្រពីអង្គការ GIZ។ សិក្ខាសាលានេះមានគោលបំណងដើម្បីបូកសរុបលទ្ធផលនៃការអនុវត្តការងារការិយាល័យច្រកចេញចូលតែមួយ និងការិយាល័យប្រជាពលរដ្ឋ ការចែករំលែកបទពិសោធន៍អំពីការអនុវត្តល្អ ព្រមទាំងពិភាក្សាអំពីការគ្រប់គ្រង និងការផ្តល់សេវានៅរដ្ឋបាលថ្នាក់ក្រោមជាតិ។
ថ្លែងក្នុងពិធីបើកអង្គសិក្ខាសាលា ឯកឧត្តម ប្រាក់ សំអឿន អគ្គនាយកនៃអគ្គនាយកដ្ឋានរដ្ឋបាល ក្រសួងមហាផ្ទៃ មានប្រសាសន៍កោតសរសើរចំពោះសមិទ្ធផលដែលសម្រចបាននាពេលកន្លងមក។ ឯកឧត្តមបញ្ជាក់ថា ក្នុងឆ្នាំ២០១៧នេះ ក្រសួងមហាផ្ទៃបានដាក់ឱ្យដំណើរការនូវការផ្តល់សេវាតាមការិយាល័យច្រកចេញចូលតែមួយ និងការិយាល័យប្រជាពលរដ្ឋនៅស្រុកគោលដៅថ្មីចំនួន៦ថែមទៀត ដែលមកទល់ពេលនេះ ការិយាល័យទាំងពីរនេះត្រូវបានបង្កើតឡើងនៅថ្នាក់រដ្ឋបាលក្រុង ស្រុក ខណ្ឌ ចំនួន៥២នៃរាជធានី ខេត្តទាំង២។
ឯកឧត្តមបន្ថែមថា នៅដើមឆ្នាំ២០១៨ខាងមុននេះ រដ្ឋបាលរាជធានី ខេត្តទាំង២៥ក៏នឹងត្រូវរៀបចំបង្កើតជាអង្គភាពច្រកចេញចូលតែមួយ និងការិយាល័យប្រជាពលរដ្ឋរាជធានី ខេត្ត ដើម្បីផ្តល់សេវារដ្ឋបាលជូនប្រជាពលរដ្ឋក្នុងដែនសមត្ថកិច្ចរបស់ខ្លួនផងដែរ។
ក្នុងពិធីបើកអង្គសិក្ខាសាលានេះផងដែរ ឯកឧត្តម គួច ចំរើន អភិបាលនៃគណៈអភិបាលខេត្តកំពង់ចាម បានសំដែងនូវអំណរគុណចំពោះរាជរដ្ឋាភិបាលកម្ពុជា ដឹកនាំដោយសម្តេចអគ្គមហាសេនាបតីតេជោ ហ៊ុន សែន ដែលបានដាក់ចេញនូវគោលនយោបាយជាតិ និងកម្មវិធីកំណែទម្រង់នានា សំដៅផ្តល់សិទ្ធិអំណាច និងធនធានកាន់តែច្រើនឡើងដល់រដ្ឋបាលថ្នាក់ក្រោមជាតិ ស្របតាមគោលការណ៍វិមជ្ឈការ និងវិសហមជ្ឈការ ដើម្បីអនុវត្តការងារដោយផ្ទាល់ក្នុងការឆ្លើយតបនឹងតម្រូវការពិតប្រាកដរបស់មូលដ្ឋាន ប្រកបដោយគុណភាព ប្រសិទ្ធភាព តម្លាភាព គណនេយ្យភាព និងសមធម៌សង្គម។
ឯកឧត្តមបានបន្តថា ការដាក់ឱ្យអនុវត្តនូវការិយាល័យច្រកចេញចូលតែមួយនិងការិយាល័យប្រជាពលរដ្ឋនៅរដ្ឋបាលថ្នាក់ក្រោមជាតិ គឺជាការអនុវត្តនូវកំណែទម្រង់ស៊ីជម្រៅវិមជ្ឈការ និងវិសហមជ្ឈការ ដែលធ្វើឱ្យមានការប្រែប្រួលផ្លាស់ប្តូរជាបន្តបន្ទាប់ ធ្វើឱ្យមន្ត្រីផ្តល់សេវាកាន់តែមានភាពរហ័សរហួន មមាញឹក ទទួលខុសត្រូវ និងបើកចំហជាមួយប្រជាពលរដ្ឋ។
ដោយលោក ខៀវ ដារា