នាព្រឹកថ្ងៃច័ន្ទ ១កើត ខែភទ្របទ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី១០ ខែកញ្ញា ឆ្នាំ២០១៨ សាលាជាតិរដ្ឋបាលមូលដ្ឋាន(NASLA) បានបើកវគ្គបណ្តុះបណ្តាលស្តីពី “ការគ្រប់គ្រងសម្រាប់អភិបាលក្រុង ស្រុក ខណ្ឌ” នាមជ្ឈមណ្ឌលសហប្រតិបត្តិការអន្តរជាតិកម្ពុជា-កូរ៉េ ក្រោមអធិបតីភាព ឯកឧត្តម ង៉ាន់ ចំរើន រដ្ឋលេខាធិការក្រសួងមហាផ្ទៃ និងជាអនុប្រធានប្រតិបត្តិនៃលេខាធិការដ្ឋាន គ.ជ.អ.ប(NCDD) រួមជាមួយលោក សូ មុនីរក្សា នាយកសាលាជាតិរដ្ឋបាលមូលដ្ឋាន(NASLA) និងជាប្រធាននាយកដ្ឋានបណ្តុះបណ្តាល ក្រសួងមហាផ្ទៃ និងលោក Robert A. Boothe តំណាងធនាគារអភិវឌ្ឍន៍អាស៊ី (ADB)។ វគ្គបណ្តុះបណ្តាលនេះមានរយៈពេល១០ថ្ងៃ ត្រូវបានរៀបចំឡើងក្រោមកិច្ចសហការពីធនាគារអភិវឌ្ឍន៍អាស៊ី(ADB) និងលេខាធិការដ្ឋានគ.ជ.អ.ប សម្រាប់ក្រុមគោលដៅជាអភិបាលក្រុង ស្រុក ខណ្ឌ ក្នុងគោលបំណងពង្រឹងសមត្ថភាពដឹកនាំ គ្រប់គ្រងរបស់អភិបាលក្រុង ស្រុក ខណ្ឌ ដោយផ្ដោតលើ៖
- ការយល់ដឹងអំពីគោលនយោបាយ ច្បាប់ និងលិខិតបទដ្ឋានពាក់ព័ន្ធ
- ការអនុវត្តតួនាទី ភារកិច្ចដោយឈរលើគោលការណ៍នៃអភិបាលកិច្ចល្អ
- ការធ្វើសេចក្ដីសម្រេចជាយុទ្ធសាស្រ្ត
- ការដឹកនាំ គ្រប់គ្រងការងារប្រចាំថ្ងៃប្រកបដោយប្រសិទ្ធភាព។