កំពត ៣១ មីនា ២០១៤៖ កាលពីព្រឹកថ្ងៃទី២៤ ខែមីនា ឆ្នាំ២០១៤ ឯកឧត្ដម ខូយ ឃុនហ៊ួរ អភិបាលនៃគណៈអភិបាល ខេត្តកំពត បានទទួលស្វាគមន៍ និងជួបពិភាក្សាជាមួយប្រតិភូ ការិយាល័យសហប្រតិបត្តិការយោធាប៉ាស៊ីហ្វិករបស់ស្ថានទូតសហរដ្ឋអាមេរិកប្រចាំប្រទេសកម្ពុជា…
កំពត ៣១ មីនា ២០១៤៖ កាលពីព្រឹកថ្ងៃទី២៤ ខែមីនា ឆ្នាំ២០១៤ ឯកឧត្ដម ខូយ ឃុនហ៊ួរ អភិបាលនៃគណៈអភិបាល ខេត្តកំពត បានទទួល
ស្វាគមន៍ និងជួបពិភាក្សាជាមួយប្រតិភូការិយាល័យសហប្រតិបត្តិការយោធាប៉ាស៊ីហ្វិករបស់ស្ថានទូតសហរដ្ឋអាមេរិកប្រចាំប្រទេសកម្ពុជាដឹកនាំដោយ
ឯកឧត្ដម ឧត្ដមនាវីត្រី ប្រាយអ៊ែន ស៊ីពមែន (Brian Shipman)។
កំឡុងពេលជួបពិភាក្សារយៈពេល១ម៉ោង នៅសាលប្រជុំសាលាខេត្តកំពត ឯកឧត្ដម អភិបាលខេត្ត បានបង្ហាញនូវឆន្ទៈក្នុងការសហការជាមួយ
ការិយាល័យសហប្រតិបត្តិការយោធារបស់ស្ថានទូតសហរដ្ឋអាមេរិក ដែលបានជួយឧបត្ថម្ភដល់ការសាងសង់អគារសម្ភពនៅមណ្ឌលសុខភាព
ត្រពាំងរពៅ និងមានប្រសាសន៍គាំទ្រលទ្ធផលនៃការចុះអង្កេតកន្លងមកទទួលបានលទ្ធផលល្អដោយខេត្តក៏ធ្លាប់ស្វែងរកដៃគូ និងសប្បុរសជនជួយបាន
ខ្លះៗមួយរយៈកន្លងមក ហើយអ្វីដែលឯកឧត្ដមចង់បាន គឺកន្លែងស្នាក់នៅ និងសម្រាលកូននេះតែម្ដង។ ការផ្ដល់នូវអគារនេះនឹងចូលរួមក្នុងការ
កាត់បន្ថយភាពក្រីក្រ និងអត្រាមរណៈរបស់កុមារជាពិសេសគ្រួសារក្រីក្រដែលមិនមានលទ្ធភាពទៅសម្រាកនៅគ្លីនិកឯកជន ហើយស្របតាមយុទ្ធសាស្ត្រ
របស់រាជរដ្ឋាភិបាលដែលកំពុងរៀបចំឱ្យមានមណ្ឌលសុខភាពនៅគ្រប់ឃុំ។ ឯកឧត្ដមអភិបាលខេត្តក៏បានស្នើសុំឯកឧត្ដម ឧត្ដមនាវីត្រី ជួយផ្ដល់នូវ
សម្ភារៈ និងបរិក្ខារមួយចំនួនសម្រាប់បំពាក់ក្នុងអគារសម្ភពនេះផងដែរ។
ឆ្លើយតបនឹងការស្វាគមន៍របស់ឯកឧត្ដម អភិបាលខេត្ត ឯកឧត្ដម ឧត្ដមនាវីត្រី បានកោតសរសើរដល់ឆន្ទៈ ក្នុងការសហការនេះ ហើយឯកឧត្ដម
ក៏យល់ស្របដែរថាគម្រោងសាងសង់នេះនឹងជួយដល់ប្រជាពលរដ្ឋក្រីក្រនៅមូលដ្ឋាន។
ឯកឧត្ដម បានបន្ថែមថា ឆ្លងតាមបទពិសោធន៍ក្នុងកិច្ចសហការនេះ ឯកឧត្ដម ព្រមទាំងក្រុមការងារនឹងពិនិត្យមើលលទ្ធភាពថាតើធ្វើបែបណាឱ្យកាន់តែប្រសើរទៅថ្ងៃអនាគត។
នៅថ្ងៃទី១ ខែមេសា ឆ្នាំ២០១៤ នឹងមានរៀបចំពិធីបញ្ចុះបឋមសិលាមុននិងចាប់ផ្ដើមធ្វើការសាងសង់ហើយបន្ទាប់មកនៅថ្ងៃទី២៨ ខែមិថុនា ឆ្នាំ២០១៤
ឯកឧត្ដមអភិបាលខេត្ត នឹងអញ្ចើញចូលរួមជាគណៈអធិបតីក្នុងពិធីកាត់ខ្សែបូដាក់ឱ្យប្រើប្រាស់អគារសម្ភពនេះ៕